WORLD VISION YATOA VIFAA VYA KUJIKINGA NA COVID-19 VYA MILIONI 17 KWA MKOA WA TABORA

Mkuu wa Mkoa wa Tabora Aggrey Mwanri akiwa ameshika gauni la kuvaa watoa huduma wakati wa kumhudumia mgonjwa wa ugonjwa wa Covid-19 mara baada ya kupokea msaada wa vifaa vya kupambana na janga hilo jana kutoka Shirika la World Vision Tananzia. 

Mkuu wa Mkoa wa Tabora Aggrey Mwanri (kulia) akimkabidhi jana Mkuu wa Wilaya ya Igunga John Mwaipopo mmoja ya gauni likiwa ni msaada kutoka Shirika la World Vision kwa ajili ya kutumiwa na watoa huduma wakati wa kumhudumia mgonjwa wa Covid-19.

Mkuu wa Mkoa wa Tabora Aggrey Mwanri (kulia) akimkabidhi jana Mkuu wa Wilaya ya Nzega Godfrey Ngupula (kushoto) vitakasa mkono ikiwa ni sehemu ya msaada kutoka Shirika la World Vision kwa ajili ya kukabiliana na ugonjwa wa Covid-19.

Mkuu wa Mkoa wa Tabora Aggrey Mwanri (kulia) akimkabidhi jana Mkuu wa Wilaya ya Igunga John Mwaipopo (kushoto) vitakasa mkono ikiwa ni sehemu ya msaada kutoka Shirika la World Vision kwa ajili ya kukabiliana na ugonjwa wa Covid-19.

Meneja wa Kanda wa Shirika la World Vision Tanzania John Masenza akitoa maelezo mafupi kabla ya kukabidhi msaada wa vifaa mbalimbali vya kukabiliana na ugonjwa wa Covid-19 wenye thamani ya milioni 17 kwa Mkuu wa Mkoa wa Tabora Aggrey Mwanri.

Na Tinganya Vicent, Tabora

SHIRIKA la World Vision Tanzania limekabidhi vifaa vya thamani ya shilingi milioni 17.1 vya kudhibiti virusi vya Corona vinavyosababisha ugonjwa wa homa kali ya mapafu ya Covid -19 kwa Mkoa wa Tabora

Msaada huo umekabidhiwa jana mjini Nzega na Meneja wa Kanda wa Shirika World Vision John Masenza kwa Mkuu wa Mkoa wa Tabora Aggrey Mwanri.

Alitaja msaada huo unajumuisha glovu boksi 990, magauni ya wahudumu wa afya ya kuwafaa wakati wa kuwahudumia wagonjwa 80 , lita 290 ya vitakasa mikono na vipasa saui kwa ajili ya utoaji wa elimu kujikinga na corona 22.

Masenza alisema msaada huo utagawanywa kwa Halmashauri zote nane za Mkoa wa Tabora ili ziwaweze watoa huduma kusaidia katika mapambano dhidi ya Covid-19.

Alisema msaada mwingine ambao ni barakoa kwa ajili ya huduma za upasuaji ziko njia na zitarajiwa kuwakabidhiwa baada ya kuwasili.

Akipokea msaada huo Mkuu wa Mkoa wa Tabora Mwanri alilishukuru shirika la World Vision kwa kuunga mkono juhudi za Serikali za kukabiliana na kudhibiti ugonjwa wa Covid -19.

Alisema msaada huo umekuja wakati muhimu ambapo Taifa liko katika vita ya kudhibiti ugonjwa wa Covid- 19 usiendelee kusambaa.

Mkuu huyo wa Mkoa alisema wadau wote Mkoani humo wanapaswa kuungana katika vita ili hatimaye waweze kuushinda ugonjwa wa Covid-19.

Alisema msaada huo walioupokea baada ya kudhibitishwa na wataalamu wa sekta ya afya kuwa ziko vizuri zitagawanywa katika Wilaya zote za Mkoa wa Tabora kwa ajili ya kuwasaidia watoa huduma za afya ambao wanasaidia kukabiliana na ugonjwa wa Covid-19 na watu wengine ambao hajiwezi.

Mkuu huyo wa Mkoa alitoa wito kwa wadau wengine wanaoendesha shughuli zao ikiwemo za biashara na kutoa huduma mbalimbali kuendelea kushirikiana na Serikali katika mapambano dhidi ya janga la Corona.