WAFANYAKAZI WA CARTRACK TANZANIA WAJITOLEA KUPANDA MITI YA MATUNDA NA MBOGA KITUO CHA WATOTO CHA MALAIKA, MKURANGA, PWANI

Meneja Uendeshaji wa kampuni ya utengenezaji na uwekaji wa vifaa vya kuratibu matumizi ya magari na kusaidia upatinakaji wa magari yaliyoibiwa ya Cartrack Tanzania, Bi. Jayne Nyimbo (katikati), akipanda miti pamoja na baadhi ya watoto wanaolelewa katika kituo cha watoto yatima cha Malaika Village, katika hafla ambayo wafanyakazi wa kampuni hiyo walipanda miti ya matunda na mboga mboga na kisha kukabidhi msaada wa aina mbalimbali za vyakula ikiwa ni sehemu ya shughuli za kijamii kwa kituo hicho kilichopo Mkuranga mkoani Pwani mwisho mwa wiki.     

WATANZANIA hususan wamiliki wa magari wameshauriwa kufunga vifaa vya kidigitali kwenye magari yao vitakavyosaidia upatikanaji wa magari yao kirahisi pindi yatakapoibiwa.

Ushauri huo umetolewa na Mkurugenzi Mtendaji wa Kampuni ya Cartrack Tanzania, Bi. Anna Nyimbo katika hafla ya kukabidhi misaada kwa kituo cha watoto yatima cha Malaika  Children's Village kilichopo Mkuranga, Pwani mwishoni mwa wiki.

Alisema wamiliki wa magari wanapaswa kutumia vifaa vya kisasa ili pamoja na kusaidia upatikanaji wa magari yao lakini pia wanaweza kujua mwenendo mzima wa magari yapo popote yaendapo.

"Dereva anakuaga anaenda kariakoo njiani anabadilisha njia na kwenda uelekeo mwingine hivyo kukuongezea gharama za matumizi ya mafuta, hivyo ukifunga kifaa cha Cartrack utaweza kujua kila uelekeo wa gari lako lilipo," akasema.

Mkurugenzi huyo aliongeza kuwa matumizi ya vifaa vya Cartrack katika kusaidia upatikanaji wa magari yaliyopotea umekuwa na mafanikio makubwa katika siku za karibuni ukizingatia kuwa shughuli hizo wamekuwa wakiziendesha kwa ushikiriano wa karibu na jeshi la polisi nchini.

"Wamiliki wa magari wasione hasara kufunga vifaa vya usalama katika magari yao kwani mathalani kwa gharama ya shs 60,000 kwa mwezi unaweza kuokoa hasara kubwa ambayo ingetokea pindi gari lako litakapoibiwa au kwa matumizi mabaya ya madereva," aliongeza.

Akizungumza kuhusu msaada wao kwa kituo cha Malaika Bi. Anna alisema lengo lao ni kujaribu kuwawezesha watoto hao ili waweze kukabiliana na changamoto zao wenyewe.

"Tumekuja kuwasaidia kupanda miti ya matunda kama miembe na michungwa, na kupanda mboga mboga kusudi waweze kujiwezesha hata bila ya kusubiria misaada," alisema.

Naye Meneja wa kijiji hicho James Kalinga alisema kituo chao chenye watoto 70 kinakabiliwa na changamoto mbalimbali kubwa ikiwa ni ukosefu wa fedha katika kuondesha shughuli mbalimbali za kituo.

"Kuna watoto wanasoma shule ya msingi mkuranga, kilomita sita kwenda na kurudi kwa miguu, tuna watoto wanasoma shule za sekondari, uhaba wa nguo, viatu.. natoa wito kwa wadau wengine kuiga mfano wa Cartrack ambao wametusaidia kutuonye njia ambayo watoto wanaweza kujitegemea," alisema.