Nabii Suguye atangaza kiama ya wafuga majini

Mhubiri mashuhuri wa Neno la Mungu Tanzania, Nabii Nicolaus Suguye, ameliamsha “dude” kwa kutangaza oparesheni maalumu ya kusambaratisha majini na nguvu za giza Tanzania, itakayoanzia jijini Dar es Salaam na kuenea nchi nzima.

Nabii Suguye ambaye ni Kiongozi Mkuu wa Huduma ya The Word of Reconciliation Ministries (WRM) mara kwa mara amekuwa akifanya utumishi wake jijini Dar es Salaam, ambapo katika ibada zake, matendo makuu, ishara na maajabu vimekuwa vikishuhudiwa.

Akitangaza oparesheni hiyo Dar es Salaam hivi karibuni, Nabii Suguye alisema kuwa Mungu amemtuma kuwafungua watu wake waliofungwa katika magereza ya nguvu za giza nchi nzima na oparesheni hiyo kubwa, itazinduliwa tarehe 27 ya Mwezi Septemba, 2017 katika Viwanja vya Hali ya Hewa, Ukonga Banana, jijini Dar es Salaam, kasha kuendelea katika mikoa mbalimbali Tanzania.

“Nilikuwa kwenye maombi, Mungu alinionyesha watu wake wakiteseka katika mateso makali ya nguvu za giza. Kisha nikasikia sauti ikiniambia kuwa nimetumwa mimi kwenda kuwakomboa, ndio maana kanisa letu limeamua kutekeleza oparesheni hii kwa kuanzia na siku tano za mapambano zitakazoshuhudia ushindi mkuu kwa waaminio”, alisema Nabii Suguye.

Alisema kuwa, pamoja na kuzindua oparesheni hiyo ya kukabiliana na majini na wale wanaoyafuga, pia watatumia mkutano huo kumshukuru Mungu kwa ajili ya amani ambayo ameipa Tanzania kama zawadi ya pekee.

Akifafanua Nabii Suguye alisema kuwa amani ya Tanzania ni matokeo ya neema ya pekee kutoka kwa Mungu na ataongoza maelfu ya Watanzania kupaza sauti zao juu kumpa Mungu sifa na utukufu kwa kuilinda nchi na kuiepusha na mabalaa.

Kanisa la WRM ni miongoni mwa makanisa yanayokuwa kwa kasi ya ajabu, huku likiendesha huduma maalumu ya maombi na maombezi kwa watu kutoka ndani na nje ya Mkoa wa Dar es Salaam na nje ya nchi pia; likiwa na hosteli maalumu za kuwapokea wagonjwa na wenye kuteswa na ibilisi.

Shuhuda za matendo makuu ya Mungu yanayotendeka kupitia mikono ya Nabii Suguye, zimekuwa zikionekana kupitia kituo cha luninga cha huduma hiyo kiitwacho WRM TV, ambayo inapatikana kwenye king’amuzi cha Azam, Startimes na Satelite na kuwa mchango mkubwa katika ujenzi wa ufalme wa Mungu.