KIJANA WA KIMAASAI AFUNGA NDOA NA WANAWAKE WAWILI WAKATI MMOJA KENYA

Morani mmoja katika kaunti ya Kajiado nchini Kenya ameacha watu midomo wazi baada ya kufunga ndoa na wanawake wawili kwa mpigo.

Tom Makui, maarufu kama Junior, 27, alifanya sherehe hiyo ya harusi Jumanne wiki hii.

Ameambia Mwandishi wa BBC Anne Ngugi kwamba sasa watu wameanza kumbandika majina ya ajabu.

"Nimeitwa Simba na hata Dume," amesema.

Makui anatokea kwenye familia ambayo ndoa za wake wengi ama mitala ni jambo la kawaida.

Hata hivyo kuoa wake wawili kwa mpigo ni jambo ambalo halikuwahi kusikika katika jamii ya Kimaasai ambayo wanandoa hao wametokea. Wapo wanaume wanaowaoa wake wengi lakini si kwa wakati mmoja.

Katika harusi hiyo ambayo ilipambwa vilivyo katika kitongoji cha Kisaju, Mako aliwaoa Elizabeth Silamoi, 25, na Joyce Tikoyo, 23.

Wote wawili ni wanafunzi wa chuo kikuu cha Kenya Assemblies of God mjini Kitengela, si mbali sana na eneo Kisaju anakoishi Tom.

Huhudhuria masomo na kurejea nyumbani jioni. Wamekuwa pamoja kwa mwaka mmoja, na sherehe ya Jumanne ilikuwa ya kurasmisha ndoa kati ya kitamaduni.

Ana wasiwasi kuhusu kutosheleza mahitaji ya wawili hao?

"Nina uhakika kuwa nitaweza kuwatosheleza wake wangu wawili, najua wana umri ambao kila mwanamke anahitaji mume wake, lakini mimi sijichanganyishi na vileo wala sigara au madawa ya kulevya kwa hivyo nitaweza kazi zote kuwaridhisha wake wangu," anasema Makui.

"Mambo ya kule ninakoishi sana sana mimi ninaamua jioni nitakapolala, hakuna siku nimegawanya wala nini, mimi hupiga simu na kumueleza mke mmoja kuwa siji kwake na ninakwenda kwa mwenzake wako majirani ndani ya boma langu."

Mako alikutana na Bi Silamoi miaka miwili iliyopita wakati akichunga ng'ombe wake karibu na nyumabni kwa mwanamke huyo.

Mwaka jana akakutana na Bi Tikoyo pia akiwa anachunga ng'ombe karibu na kwao.

Katika mila za Kimasai, mahari ya ng'ombe hutolewa kabla ya kufungwa kwa ndoa, na bwana harusi Makui alikamilisha hilo ipasavyo.

Mako aliwaoa wakeze kimila japo wote walivalia mavazi ya kimagharibi. Makui alivalia suti ya rangi ya samawati na wakeze wakivaa mashela meupe. Wote pia walivalia urembo wa Kimaasai.

"Nataka kuliweka sawa hili, harusi yangu ilikuwa ya kimila na haikuwa na mahusiano yoyote na kanisa. Kuna watu wanatuma habari za kupotosha mitandaoni kuwa ndoa yangu ilisimamiwa na wachungaji," Makui, ambaye ni mfanyabiashara, awali aliambia gazeti la kibinafsi la Star la nchini Kenya.

Amesema amewaoa wanawake hao kwa sababu wote wanampenda na hakutaka kumsononesha yeyote kati yao.

"Huu ni ujumbe ninaoutuma kwa waume wa kisasa wanaojifanya kuwa wanampenda mwanamke mmoja na huku wakiwalaghai kwa kuingia kwenye mahusiano na wengine pembeni," amesema.

"Nimekuwa muaminifu kwa wake zangu kwa sababu sitakuwa na sababu ya kuongeza mke mwengine. Ninaamini wawili watanitosheleza."

Wake hao wawili wanapendana?

Bi Silamoi ndiye aliyekuwa wa kwanza kuingia kwenye penzi na Makui, na kusema kabla ya kuja kwa mwenzake wawili hao walijadiliana kwa kina na kukubaliana.

"Ninampenda. Nilimpa Baraka zangu kuongeza mpenzi. Nampenda (mke mwenzake) pia."

Mke wa pili Bi Tikoyo alipoulizwa na BBC kuhusu kuingia kwake kwenye uhusiano huo, alisema:

"Hapa mimi sijakuja kuharibu ndoa , tulisikilizana wote na mke mwenza hakuwa na matatizo yeyote na mimi, mimi nilipenda mumewe wangu tu nilipomuona na sina wasiwasi wakuwa tuko wawili "

Naye Mke wa Kwanza alipoulizwa ikiwa hana wivu kuwa ana mwenza, alisema:

"Ndio wivu lazima uwepo kwa kuwa sisi ni binadamu lakini kwa kuwa ninampenda mume wangu nimekubali tu, ndio ndoa ina changamoto nyingi lakini kwa yote ninamtumainia Mungu."

Bi Tikoyo, amesama wote wamekubaliana kuwa katika mahusiano ya aina hiyo na wazazi wake walikubali hilo kwa sababu wanamuamini Makui.

Wazazi wa bwana harusi, Bw Makui Busabus na Bi Sintiyio, wamesema hawakuamini mwanzoni mtoto wao alipowaambia anataka kuoa wake wawili kwa siku moja, na sherehe moja. Lakini hilo limepita.

"Kwa umri wangu wa miaka 90 sijawahi kuona kitu kama hiki huku umasaini. Kwa kawaida, mtu anayetaka kuongeza mke husubiri kwanza walau baada ya mwaka au miaka miwili toka alipofunga ndoa ya kwanza," amesema Busabus.

Mamorani wengine pamoja na wageni waliohudhuria harusi hiyo wanamchukulia Makui kama shujaa kwa kufanya jambo ambalo halikuwahi kufanyika kabla Umasaini.

Baadhi wanasema ameonyesha ukomavu, na hata anafaa kugombea wadhifa wa diwani na baadaye hata awe gavana wa jimbo.