HUWEZI KUWA SHUJAA KWA KUMDIDIMIZA SHUJAA MWINGINE

Suala la katazo la kuingiza filamu za nje nchini Tanzania limepokelewa kwa hisia tofauti na watu wengi mimi ni mmoja wao ila kwangu nina mawazo tofauti na wengi.

Kama nilivyoanza kwa kusema hapo kwamba huwezi kuwa shujaa kwa kumdidimiza shujaa mwingine, kwanza nisisitize hatuwezi kuboresha soko letu la filamu kwa kufungia au kudidimiza soko la filamu toka kwingine ambalo limeshakuwa kubwa na limeendelea kuboreshwa kwa muda mrefu kwa kutumia ushirikiano wa sekta mbalimbali za nchi husika.

Ukiangalia filamu za kimarekani ambazo naamini ndizo zinazozungumziwa hapa, kuna aina nyingi za filamu, zenye kulenga umri, jinsia, historia za kweli au uwongo, matukio ya kweli, tamthilia, documentaries na mengine mengi na pale unapoenda kununua kwa njia ya mtandao filamu husika huwa iko kwenye category hizo hapo juu – kuhusu kufungia filamu za nje lile tamko halijasema ni za aina gani kulingana na category nilizotaja hapo juu.

Mfano ukizuia documentaries za vitu kama historia, afya, maonyesho ya sanaa muziki au silaha kila mtu atakushangaa maana mambo hayo ni muhimu sana kwa watu kujifunza na kupata mengine yaliyowahi kutokea duniani, yanayokuja na tuliyonayo sasa hivi na maisha kwa ujumla.

Mimi huwa naangalia documentary 10 mpaka 20 kila mwezi zenye mafunzo mbalimbali na baadhi nimeshiriki kuchangia script zake kwenye vipengele vinavyohusu sayansi na tekinolojia.

Filamu nyingi za marekani zilizoanza kutoka mwaka 2010 mpaka 2017 utaona wakati zinaisha zina nembo iliyoandikwa State of Georgia imekuwa hivyo kwasababu jimbo hilo lilihitaji kujitangaza fursa zake na mengine yaliyopo na ikaonekana moja ya mbinu ni kuwekeza kwenye filamu kwa kukaribisha wacheza filamu kurekodi movie kwenye vivutio vya maeneo mbalimbali ya jimbo hilo na sasa hivi mapato yake yameongezeka zaidi ya mara 40 kutokana na mkakati huu.

Ukitazama filamu za Uingereza utaona mara nyingine wanaonyesha mto themes pamoja na daraja la London na vivutio vingine mbalimbali ambapo watazamaji wa filamu hizo hutaka kwenda kutembelea kujionea masuala mbalimbali.

Kwa Tanzania tuna mbuga za wanyama Zaidi ya 5, milima mirefu, miundombinu kama daraja la, kilombelo, mkapa na kigamboni; magorofa pacha pale dar es salaam, Bagamoyo, Zanzibar, Ziwa Tanganyika, Nyasa, Victoria, Mabasi ya Mwendo kasi, Visima vya gesi, Mashamba ya chai, Tumbaku, Kahawa, Viazi na maeneo mengine mengi – maeneo haya yote yanaweza kutumika katika kuvutia wacheza filamu wa nje au wa ndani kutengeneza filamu zao zenye ubora kwa gharama nafuu au bila gharama kabisa lakini pesa zitarudi kwa kuuza filamu au watu watakaopenda kutembelea maeneo hayo kwa nia ya kutalii au kuendeleza kwa kufanya uwekezaji wa nguvu.

Ni suala la kuandaa kongamano kubwa la filamu au Sanaa kisha kualika wadau mbalimbali wa sekta hiyo toka sehemu mbalimbali duniani ambao watatembezwa katika vivutio vyote hivyo na kupewa offer ya gharama nafuu au bure kabisa kutengeneza filamu za aina mbalimbali kisha kazi ianze mara moja.

Pia tuandae scholarship zitakazogharamiwa na serikali ya Tanzania zenye lengo la kufanya tafiti mbalimbali zinazohusu Sanaa haswa filamu katika maeneo mbalimbali ya Tanzania ambapo tutaalika wanafunzi toka sehemu mbalimbali za dunia kufanyia kazi lakini kwa lengo la kutangaza, kuvutia na kutangaza fursa mbalimbali zilizopo kwenye sekta hii.

Vikundi vyote vya Sanaa za maigizo vinatakiwa kupewa ruzuku maalumu kwa ajili ya kununua vifaa, kujiendeleza kimasomo na kimkakati, mikoa yote lazima iwe na orodha ya wasanii wake na aina ya Sanaa wanazofanya napengine maeneo wanayofanyia kazi zao ili kuweza kufuatiliwa na kusaidiwa kimkakati pale itakapohitajika.

Katika kusemea masuala ya filamu na Sanaa kwa ujumla kuna Baraza la Sanaa, COSOTA, na vyama vingine hawa wote wapewe fursa kuongea na kujadili suala hili maana ni taasisi za kitaifa zinazotambulika  sio za mkoa au wilaya.

Mwisho tukumbuke serikali yetu imeruhusu biashara huria kwahiyo lazima tukubali kushindana kama wengine ili tushinde lazima tuboreshe kazi zetu lazima kuthamini wazalishaji wetu lakini tuboreshe elimu na maeneo mengine mengi ya kimkakati ili kuweza kupata kazi za uhakika.

Kuzuia au kufungua filamu za nje ni kujitenga na soko la kimataifa je sisi tutauza wapi kazi zetu kama tunafungia zao? Ziendelee kuja lakini kwa taratibu bila kuvunja haki miliki za watengenezaji husika.