ENTUJAEL MSANGI AJA NA VIDEO KALI ‘SABABU YA KUMWABUDU’

Mwimbaji wa nyimbo za Injili nchini, Entujael Msangi anatarajia kuanza kurekodi video ya albamu yake ya pili iitwayo ‘Sababu ya Kumwabudu’ baada ya mashabiki wake kuomba afanye hivyo.

Akizungumza na Wor’Out Media Blog jana wakati wa Uzinduzi wa DVD ya ‘Yesu Kwanza’ ya muimbaji Lilian Boneka uliofanyika katika Kanisa la Christian Power House, Mbezi Kibanda cha Mkaa, Entujael alisema, amekuwa akipata usumbufu kutoka kwa mashabiki wake kila anapoenda kuhudumu, kwa sababu hutaka kununua albamu hiyo na wakigundua kuwa haipo katika mfumo wa video wanasitisha kuchukua kwa madai wanatamani kumuona akiimba na si kusikiliza peke yake.

“Wakati wowote kuanzia sasa, nitaanza kurekodi albamu yangu ya pili na Kampuni iitwayo Green Waves Media, na naamini kwautukufu wa Bwana Mtabalikiwa, kwani matayarisho yake kwa kiasi kikubwa yamekamilika”

Entujael aliwaahidi mashabiki wake kupata kile wanachotaka kwani hatawaangusha, kwasababu video ya albamu hiyo itakuwa na ubora wa hali ya juu ambayo haitamchosha kila atakayekuwa akiitazama popote atakapokuwa na anaamini wengi wataupata vizuri ujumbe wa Neno la Mungu uliomo ndani ya nyimbo hizo.