Azam imemnasa golikipa wa Mbao kufukia shimo la Manula

Ni mwendo wa ‘toa kitu weka kitu’. Baada ya Aishi Manula kusaini mkataba wa miaka miwili kujiunga na Simba, klabu ya Azam imemnasa golikipa wa Mbao FC Benedict Haule na kumsainisha mkataba wa miaka miwili ili kuziba nafasi iliyoachwa na Manula.

Haule amepata umaarufu baada ya kusimamishwa kwa aliyekua golikipa namba moja wa Mbao Musa Ngwegwe. Haule alifanya vizuri kwenye mechi alizosimama golini kuelekea mwisho mwa msimu na kuisaidia timu yake kukwepa kushuka daraja huku akiifikisha fainali ya Azam Sports Federation Cup.

Mechi kati ya Mbao dhidi ya vigogo vya soka nchini (Simba na Yanga) zilimpa jina baada ya kuonesha kiwango cha juu. Licha ya kupoteza mchezo kwa mabao 3-2 mbele ya Simba, kipa huyo alikuwa kwenye kiwango bora.

Alionesha uwezo mkubwa kwenye mchezo wa mwisho wa ligi dhidi ya Yanga na kuiongoza Mbao kushinda kwa goli 1-0 ushindi ambao uliwahakikishia kubaki kwenye ligi kuu kwa ajili ha msimu ujao.

Simba watamkumbuka Haule kwa kile alichokifanya kwenye uwanja wa Jamhuri Dodoma siku ya mechi ya fainali ya Azam Sports Federation Cup ambapo Simba ilishinda kwa magoli 2-1 na kuchukua taji hilo lililowapa fursa ya kucheza michuano ya Caf Confederation Cup msimu ujao.

Haule amesaini mkataba wa miaka miwili leo jioni mbele ya Meneja Mkuu wa Azam FC, Abdul Mohamed sambamba na Meneja wa timu, Phillip Alando, utakaoanza kufanya kazi kuanzia Julai Mosi mwaka huu.

Usajili huo unamfanya kipa huyo kurejea tena nyumbani ndani ya viunga vya Azam Complex, kwani aliwahi kulelewa katika kituo cha Azam Academy chini ya Kocha wa Makipa wa Azam FC, Idd Abubakar.

Kipa huyo anaungana na makipa wengine wa Azam FC, Mwadini Ally na Metecha Mnata, tayari kabisa kuanza mchakamchaka wa kujiandaa na msimu ujao kuanzia Julai 3 mwaka huu.

Huo ni usajili wa nne kwa Azam FC kuelekea msimu ujao 2017/2018, wengine ambao tayari saini zao zimenaswa ni kiungo nyota Salmin Hoza na washambuliaji wanaokuja kwa kasi Mbaraka Yusuph na Wazir Junior.

Mbali na usajili wa wachezaji hao, tayari benchi la ufundi la mabingwa hao wa Kombe la Mapinduzi na Ngao ya Jamii chini ya Mromania Aristica Cioaba, limefanya uamuzi wa kuwapandisha vijana sita kutoka kituo cha Azam Academy.

Mabeki Abbas Kapombe, Abdul Omary, Godfrey Elias na Ramadhan Mohammed, anayemudu kucheza namba nyingi uwanjani, kiungo Stanslaus Ladislaus na mshambuliaji Yahaya Zaid, aliyeibuka mfungaji bora wa Ligi Daraja la Kwanza msimu uliopita kwa mabao yake tisa wakati alipokuwa akiichezea kwa mkopo Ashanti United.