RC Makonda - Nikimlilia Mungu wangu si bora zaidi kuliko wewe unayelilia mapenzi

Na Sosthenes Makero, WRM

MKUU wa Mkoa wa Dar es Salaam, Paul Makonda amesema kuwa anawashangaa viongozi na watu wanao mshangaa wakiziona picha zinazozagaa mitandaoni akilia madhabahuni; “Naomba niwaambie kitu, neno hili mnalojifunza hapa nibora kuliko kitu chochote, ninawashangaa wale wanaonishangaa nikilia madhabahuni; labda niwaambie vizuri, ni bora mimi ninayelia madhabahuni kumlilia Mungu anishindiaye vita kuliko Yule aliliaye mapenzi huko mtaani”

Hatua hiyo ya Makonda kusema maneno hayo baada ya kubaini watu wengi siku hizi hawaishi katika kumtegemea Mungu, maana watumishi wa Mungu wanajitahidi kuifundisha jamii yetu kukiri ushindi kupitia neno la Mungu, lakini jamii hii inapotokea changamoto kidogo katika maisha yao ya kila siku humsahau Mungu na kujikuta wakitafuta njia mbadala kutatua changamoto iliyo mbele yake.

“Mwanafunzi anapoingia chuo akasomea udaktari, anapomaliza miaka yake minne au mitano akaajiriwa Muhimbili anachokifanya pale, ni kuutumia ule ujuzi, ule ufahamu alioupata kwa miaka yake mitano darasani, na kuutumia maabara, katika hali ya kutaka kufanya kipimo cha kugundua kama huyo mgonjwa ana malaria au la; anachokifanya ni kusoma, taarifa anayoipata maabara na kuoanisha na taarifa aliyoisoma darasani na mwisho ana hitimisha huyu ni mgonjwa wa malaria au la!”

“Tofauti na sisi wakristo wa leo, tunapoingia kwenye majaribu, tunasahau darasa tunalofundishwa na ‘Prophet’ tunaiweka biblia pembeni, neno la Mungu pembeni, tunataka kuingiza ujuzi mpya tofouti na mafundisho tuliyoyapata kanisani, ndio maana tunafika mahali tunalia kuwa Bwana ametuacha na wakati hajawahi kutuacha, maandiko yanasema; Kwa kuwa Bwana hupenda haki, Wala hawaachi watauwa wake. Wao hulindwa milele, Bali mzao wa wasio haki ataharibiwa (Zaburi 37:28) tunapoingia kwenye majaribu tunasahau yakwamba huyu niliyemuomba jumapili ndiye aliyenifikisha hapa, na ndiye ajuaye kesho yangu, kumbuka unapoingia kwenye majaribu kaa kwenye neno la Mungu pekee, Usikubali shetani akunyanyase”

Mhe. Makonda aliyasema hayo yote alipokuwa akizungumza na waumini wa Kanisa la WRM, lililopo Kivule Matembele ya Pili, Ukonga jijini humo linaloongozwa na mtumishi wa Mungu, Nabii Nicolaus Suguye, jumapili iliyopita.

Makonda aliongeza kuwa “Katika watu ambao wanapitia magumu, mimi ni mmoja wao; kama kuna mtu alipingwa kwenye nafasi yake ya ukuu wa mkoa nipo, kama kuna mtu alipigwa kwa kusemwa kwa habari ya ndoa yake kukosa motto mimi nipo, kama kuna mtu alipigwa kutoka kwenye familia masikini nipo, kama kuna mtu niliyesoma kwa tabu, shida na manyanyaso nipo, kwanini leo nisimshukuru Mungu wangu aliyenipa hivi nilivyonavyo leo”

“Unamuoneaje haya Mungu aliyekuumba, na kukupatia pumzi yake bure?” aliongeza.

Mkuu huyo alimpongeza nabii Suguye kutumika sahihi kwa Kristo, maana ni watumishi wachache sana wanaokumbuka kumjengea Mungu hekalu kwaajili ya wamuni kuabudia, wengi wao huzitapanya sadaka wazikusanyazo kwaajili ya matumizi binafsi na si kwaajili ya huduma.

RC Makonda ametaka wakina mama wamshirikishe sana Mungu kwa maombi ya kumaanisha katika kutatua changamoto za familia zao na si kukurupuka na kukimbilia kwa mahakamani au mabaraza kwani hata hao wanaopelekewa wanachangamoto zao na familia zao, yawezekana zao ni kubwa kuliko zako.

Aidha Makonda amekiri kuzifahamu changamoto zinazolikabili Jimbo la ukonga hasa maeneo ya kivule na kuahidi kuzitafutia ufumbuzi wake; “Kiukweli nafahamu changamoto za jimbo hili, najua kuna changamoto huduma ya uhakika ya afya, miundo mbinu mibovu ya barabara hasa nyakati za masika, ukosefu wa maji salama ya kunywa, usalama wa raia na mali zao, napenda kutumia madhabahu hii, kuwaahidi nitalishughulikia”.